ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီမှ ထိုင်းနိုင်ငံ အခြေအနေနှင့် ပတ်သက်၍ အသိပေးကြေငြာချက် ထုတ်ပြန်

ထိုင်းနိုင်ငံအတွင်း၌ လတ်တလောကာလအတွင်း ၎င်းတို့၏ နိုင်ငံရေးအခြေအနေမှာ တည်ငြိမ်မှုမရှိသေးသည့်အပြင် လာမည့် ၂၀၁၄ခုနှစ် ဇန်န၀ါရီလ(၁၃)ရက်နေ့တွင် ထိုင်းနိုင်ငံတ၀ှမ်းလုံး အထွေထွေဆန္ဒပြပွဲများ ကျင်းပသွားမည်ဖြစ်ကြောင်း သိရှိရသည့်အတွက် ထိုင်းနိုင်ငံအတွင်း၌ နေထိုင်ကြသော မြန်မာနိုင်ငံသားများအနေဖြင့် ဆန္ဒပြမှုများနှင့် လူစုရုံး ချီတက်ခြင်းများ စသည်တို့တွင် ပါဝင်ပတ်သက်ခြင်း မပြုလုပ်ရန်နှင့် သွားလာမှုများ သတိထားစေရန်အတွက် ထိုင်းနိုင်ငံ ဗန်ကောက်မြို့ရှိ မြန်မာသံရုံးမှ သတိပေးတိုက်တွန်းနှိုးဆော်ချက်ကို ယခုလ (၆)ရက်နေ့က ထုတ်ပြန်ကြေငြာ ထားပြီးဖြစ်ကြောင်း သိရှိရပါသည်။

ယင်းနည်းတူ တာချီလိတ်မြို့နှင့် အလွန်နီးကပ်နေသော ချင်းရိုင်းခရိုင်းအတွင်း နှင့် မယ်ဆိုင်မြို့ရှိ  မြန်မာနိုင်ငံသားများအား "ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ ( တာချီလိတ်)"မှ အဆိုပါ ကိစ္စနှင့် ပတ်သက်၍ ယနေ့ ဇန်န၀ါရီလ(၉)ရက်တွင် အထူးသတိပေးကြေငြာချက်အား ထုတ်ပြန်လိုက်ကြောင်း သိရသည်။ အဆိုပါ ကော်မတီ၏ ကြေငြာချက်အား ဖော်ပြလိုက်ပါသည်။

ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့်

စေ့စပ်ညှိနှိုင်းရေးကော်မတီ ( တာချီလိတ်)

အထူးသတိပေးကြေငြာချက် ( ၁/၂၀၁၄)

၂၀၁၄ခုနှစ် ဇန်န၀ါရီလ (၉) ရက်

တိုင်းရင်းသား မိဘပြည်သူအပေါင်းတို့ခင်ဗျား
(က)                လတ်တလော ဖြစ်ပွားနေသည့် ထိုင်းနိုင်ငံ၏ နိုင်ငံရေးအခြေအနေများနှင့် ပါတ်သက်၍ ထိုင်းနိုင်ငံသို့ ရောက်ရှိနေကြသော မြန်မာနိုင်ငံသားများအနေဖြင့် မြန်မာ - ထိုင်းနှစ်နိုင်ငံချစ်ကြည်ရေးအား ရှေးရှု၍ ပါဝင်ပါတ်သက်ခြင်း မပြုကြပါရန်နှင့် မိမိတို့၏ လုံခြုံရေးအား ထိခိုက်စေမည့်
အခြေအနေများအား သတိရှိရှိဖြင့် စောင့်ထိန်းနေထိုင်ကြစေလိုပါသည်။

(ခ) အထူးအားဖြင့် ၂၀၁၄ခုနှစ် ဇန်န၀ါရီလ (၁၃)ရက်နေ့တွင် ထိုင်းနိုင်ငံတ၀ှမ်း
အထွေထွေ ဆန္ဒပြပွဲများ ကျင်းပသွားမည်ဖြစ်ကြောင်း သိရှိရပါသည်။ အဆိုပါ အထွေထွေဆန္ဒပြပွဲတွင်
မမျှော်မှန်းနိုင်သည့် အခက်အခဲများ ၊ အန္တရာယ်များလည်း ပေါ်ပေါက်လာနိုင်သည့် အတွက် ထိုင်းနိုင်ငံ ချိန်းရိုင်းခရိုင်အတွင်း အကြောင်းအမျိုးမျိုးဖြင့် ရောက်ရှိနေထိုင်ကြသော မြန်မာနိုင်ငံသားများအနေဖြင့် ထိုနေ့တွင် မိမိတို့၏ နေအိမ်တွင်သာ နေထိုင်ခြင်းအပါအ၀င်  ဆန္ဒပြပွဲများနှင့်လွတ်ကင်းရာနေရာများတွင် နေထိုင်သွားကြပါရန် အသိပေးအပ်ပါသည်။

(ဂ)              အကယ်၍ ထိုင်းနိုင်ငံသို့ တရားဝင်သွားရောက်နေထိုင်သည့် မြန်မာနိုင်ငံသားများ
အနေဖြင့် ထိုနေ့တွင် မြန်မာနိုင်ငံ တာချီလိတ်မြို့သို့ ပြန်လည်ဝင်ရောက်ရာတွင် အခက်အခဲ
တစ်စုံတစ်ရာရှိပါက ဤကော်မတီထံသို့ဆက်သွယ်အကူအညီ တောင်းခံနိုင်ကြောင်း အသိပေး
ကြေငြာအပ်ပါသည်။

ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား 

ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ ( တာချီလိတ်)

အောက်ပါ ဖုန်းနံပါတ်များသို့ ဆက်သွယ်နိုင်ပါသည်။

0823837478၊ 0897558729၊ 0860191524၊ 0815950588၊ 0897558729၊

Tachileik Online News

web: www.tachileik.net